Першы выхад у поле, інакш кажучы заворванне – гэта вялікая падзея для кожнага селяніна, што сімвалізуе пачатак вясновай працы. З гэтай нагоды ў Чавускім раёне адбылося свята першай баразны на полі ААТ «Аграсервіс» г.Чавусы каля вёскі Пуцькі. Старшыня Чавускага райвыканкама Дзмітрый Акуліч адзначыў, што да зямлі трэба ставіцца з павагай, свое­часова выконваць работы, і яна аддзячыць ураджаем, а гэта – дабрабыт.

– Ёсць зараз усё неабходнае для атрымання добрага ўра­джаю, трэба добрасумленна працаваць, і ў нас усё атрымаецца, – сказаў кіраўнік раёна.

Старшыня райвыканкама і яго першы намеснік, начальнік ўпраўлення па сельскай гаспадарцы і харчаванню Пётр Каляснёў выйшлі першымі ў поле, праверылі гатоўнасць зямлі. Пасля кожны кіраўнік гаспадарак раёна ссыпаў зерне ў агульны кош і атрымаў сувенір у выглядзе сонца на доб­ры і багаты ўраджай.

Іерэй Міхаіл, настаяцель Свята-Мікалаеўскай Благавіцкай царквы правёў малебен, асвяціў тэхніку і ўдзельнікаў свята, пажадаў хлебаробам лепшых вынікаў працы з Божай дапамогай. Віталь Шчарбін, кіраўнік ААТ «Аграсервіс» г.Чавусы, уручыў каравай старшыні Чавускага райвыканкама на доб­ры наступны ўраджай.

Затым пачаўся абрад «Засеўкі». Першую баразну па традыі прайшлі канём. Пачаў сяўбу Дзмітрый Акуліч. За ім пад абрадавую песню «Благаславі, божа» ў выкананні народнага фальклорнага ансамбля «Спадарыня» пайшлі і іншыя сейбіты. Існаваў яшчэ адзін абрад, які дапамагаў правільна прадказаць колькасць ападкаў у сезоне. З трох аднолькавых з выгляду рушнікоў Дзмітрый Акуліч выбраў сярэдні, што азначае, што ападкаў будзе дастаткова, але не занадта. Кожнаму кіраўніку гаспадарак уручылі мяшочкі з асвечаным зернем для пачатку сяўбы.

Наталля ШКРЭДАВА