У гонар Дня беларускай мовы чавускія школьнікі сустрэліся з паэтам Міколай Салаўцовым

Дзень роднай мовы вучні сярэдняй школы №1 Чавус адзначылі сустрэчай з паэтам, сябрам Саюза пісьменнікаў Беларусі, Міколам Салаўцовым. Жадаючыя маглі пазнаёміцца з літаратурнай спадчынай паэта на падрыхтаванай з нагоды сустрэчы выставе.

Загадчык дзіцячай бібліятэкі Таццяна Філіпенка напачатку мерапрыемства расказала прысутным аб жыццёвым шляху нашага выдатнага паэта і яго творчых здабытках. Дзеці з захапленнем і пачуццём прачыталі вершы Мікалая Іванавіча, прысвечаныя родная зямлі і роднай мове. Паэт быў расчулены дзіцячай непасрэднасцю і ухваліў юных чытачоў за выдатнае валоданне роднай мовай, падзякаваў іх настаўнікам. Яшчэ ён прапанаваў знаёміцца з яго творчасцю на сайце “Наш беларускі форум” і ў чавускай раённай газеце “Іскра”.

Мікола Салаўцоў, звяртаючыся да вучняў, адзначыў мілагучнасць і выразнасць роднай мовы, на якой напісаны амаль усе вершы паэта, і заклікаў спрабаваць самім складаць паэтычныя радкі.

Мікалай Іванавіч прачытаў некалькі сваіх новых вершаў.

Я крэшу словы

Іду я дарогаю новай

Пад звон дзевяностых гадоў

І крэшу агністыя словы

З крыніц паэтычных майстроў…

Купала – жыцця майго сэрца,

А Колас – вачэй маіх зрок –

Нясу іхні факел бясмерця,

Па іх замяраю свой крок…

У сне мы сядзім і ўздыхаем

На стыку сучасных гадоў,

З Купалам – вайну праклінаем,

А з Коласам – новых паноў…

Сядзім, разважаем без жаху

Аб нашых зняможаных днях,

Аб продках, аб мове, аб сцягу–

Аб іхніх бібульных шляхах…