Родная, лепшая, мілагучная, матчына… Колькі яшчэ эпітэтаў можна дадаць, каб выказаць свае адносіны да беларускай мовы! Ва ўстановах адукацыі Чавускага раёна вялікая ўвага надаецца фарміраванню патрыятызму ў малодшага пакалення. А любоў да роднай мовы – адна са складаючых гэтага паняцця. З малых гадоў дзеці павінны чуць роднае слова.

Таму ў дзіцячым садзе №2 Чавус штотыднёва праводзіцца дзень роднага маўлення, калі і педагогі, і іх выхаванцы размаўляюць менавіта па-беларуску. А яшчэ, дзякуючы намаганням калектыва, бацькоў дзетак, тут створаны музейны куток «Беларуская хатка». Хлопчыкі і дзяўчынкі знаёмяцца з побытам продкаў, назвамі прылад працы, якімі яны карысталіся, і іх прызначэнем.

Выхавацелі праводзяць у «Беларускай хатцы» гульнёвыя праграмы, пазнавальныя экскурсіі, каб беларускія карані ў нашых малых былі трывалымі. На музычных занятках у дзень роднага маўлення дзеці і дарослыя пад баян разам спяваюць «Купалінку», «Перапёлачку» і іншыя беларускія народныя песні.

Калі мы завіталі ў гэтую ўстанову дашкольнай адукацыі, Юля Барысава і Насця Анікеева распавялі нам пра заняткі, расказалі пацешку пра бусла, паспрабавалі карыстацца посудам і прыладамі працы сваіх прапрабабуль – і ўсё з добрым настроем. Але і гэта не ўсё! Ёсць яшчэ і традыцыя частаваць дзетах беларускімі нацыянальнымі стравамі.

Мы ўсе ведаем смак нашых дранікаў, бабкі, заціркі. Трэба, каб і новае пакаленне не страціла традыцыі беларускай кухні. Словам, вяртанне да беларускаці не можа не радаваць, як і рэспубліканскі праект «Кожная пятніца – роднае, сваё». Давайце цаніць і берагчы нашу спадчыну, нашу мову і культуру!

Наталля ШКРЭДАВА