Дата: 10.02.2020 61

3 лютага ў свеце адзначаецца Дзень барацьбы з ненарматыўнай лексікай. Па колькасці нецэнзурных слоў і выразаў руская мова апынулася на 3-м месцы. На першым – англічане, на другім – галандцы.

Але давайце паспрабуем разабрацца, шаноўныя чытачы, што такое ненарматыўная лексіка? Гэта не толькі непрыстойныя і вульгарныя словы, мацюканне, але і жаргонныя словы, словы-паразіты, канцэлярызмы, дыялектызмы. Дык з чым нам прапануюць змагацца, адзначаючы Сусветны дзень барацьбы з ненарматыўнай лексікай? Мяркую, што ўсё ж маецца на ўвазе барацьба з брыдкаслоўем. Як кажуць супрацоўнікі Брытанскага Адукацыйнага Цэнтра, выкарчоўванне нецэнзурных выразаў павышае прэстыж краіны.

Газета «Іскра» неаднойчы друкавала матэрыялы на тэму барацьбы з брыдкаслоўем. Я хачу засяродзіць увагу на такіх, на мой погляд, несумяшчальных паняццях як жанчына і брыдкаслоўе. А штуршок да маіх разважанняў я атрымаў пры сустрэчы са школьнікамі. Пасля размовы да мяне падышоў адзінаццацікласнік і сказаў: «Акцыя, якую вы праводзіце па барацьбе з брыдкаслоўем сярод моладзі, патрэбная, карысная. Але працуйце вы і з нашымі бацькамі ў гэтым накірунку». Я звярнуў увагу, што хлопец не назваў аднаго бацьку, мужчыну, ён выразна сказаў: «з бацькамі», гэта значыць: і з татам, і з маці.

Паважаныя прадстаўніцы прыгожай паловы чалавецтва! Брыдкія словы, якія вылятаюць з вашых вуснаў, гэта як плямы на сукенцы, ад якіх страчваецца і прывабнасць ваша, і павага да вас, і жаданне кахаць. З другога боку, вы – маці. Гэта вялікая адказнасць. Максім Горкі казаў: «Усё прыгожае ў чалавеку – ад промняў сонца і малака маці». Бяда, калі з малаком у дзіцячыя арганізмы трапляе атрута – вашы мацюкі.
Яшчэ трэба ведаць, што ў Рэспубліцы Беларусь брыдкаслоўе па юрыдычных законах разглядаецца, як парушэнне грамадскага парадку, зневажэнне асобы, на што ёсць адпаведныя артыкулы ў Кодэксе аб адміністратыўных правапарушэннях, дзе прадугледжана адпаведная адказнасць.

Валерый ГАЎРЫШ